(5): ICIGWA KIGIRA GATANU CEREKEYE UBUHINGA BWO GUKORA URURIRIMBO

(5): ICIGWA KIGIRA GATANU CEREKEYE
UBUHINGA BWO GUKORA URURIRIMBO
(Vyabuwe mu Gitabo c’Ivyigwa bitangwa muri
Institut de Musicologie de Gitega)

Muri iki Cigwa, tuza gushimikira cane-cane ku vyerekeye ivy’ ubuhinga bw’amajwi mu ndirimbo twandika canke duhingura.

Ubuhinga bwo Guhingura Amajwi (Mélodie) y’Umuziki w’Ururirimbo.
Amajwi y’Umuziki ni ikintu gihambaye cane mu ruririmbo urwo ari rwo rwose, kuko ari yo atuma abazorwumva bazokwama barwibuka. None ni ubuhe buhinga twokoresha mu kuyahingura? Abashakashatsi muvy’Umuziki basanze hariho inzira nkuru zishika kuri zitanu zikoreshwa hirya no hino kw’Isi.

1. Gukoresha urukurikirane rw’amajwi aryohoye (Accords) n’imirindi (Rythmes) biguma bigaruka mu ruririmbo.
– Ubu buhinga ni bwo bwitwa “boucles” mu gifaransa, bukaba bushingiye ku kwubaka urukurikirane rufatanye atari rurerure rugizwe n’amajwi asamirana neza, aryhoye (accords) hamwe n’imirindi (Rythmes) biza biragaruka mu ruririmbo. Iyo “boucle” irashobora kuba igizwe n’ijwi (mélodie) twabuye ku ma “Accords” duhawe n’igicurarangisho tuba twikozeko, canke kuri “Rythme” y’ingoma tuvugije, canke zirya zivuzwa n’ama pianos amwe n’ama synthétiseurs.

– Iyo rero umaze kwubaka iyo “boucle” yawe, ca utangura kuyiririmbirako. Uririmbe amajwi ayo ari yo yose akuje mu mutwe nk’uko “Accords” wubatse zigenda zirayaguha. Usangwa na ho utazi kuririmba, rondera uwubizi abifitiye impano n’ubumenyi aze mufatanye, wewe ubandanye uvuza. Igikuru ni uko wumva amanota y’amajwi wifuza gushikako. Hamwe na ho amwe mu manota woririmba yoza ataryoshe canke adahuye na “Accords” uriko uravuza, ntibigutere ikibazo; umwanya wo kubigorora uracariho.

– Kugira rero ushobore kuronka ijwi ry’ururirimbo (mélodie) rihuye n’ivyo uriko uracuraranga, ni ngombwa wubakire ku manota ari muri arya ma “Accords” nyene uba uriko uravuza. Akarorero: usangwa uriko uravuza DO Majeur, ca ukoresha amanota DO canke MI, canke SOL muri “Mélodie” yawe. Mugabo rero ntutinye kwaguka ngo witerere mu kuririmba n’ayandi manota kugira “Mélodie” yawe igire ubudasa yisangije (originalité).

2. Gukoresha “boucles” (inyubako) z’ama “Accords” y’ururirimbo kanaka rusanzwe ruriho, usanzwe uzi kandi uhora uririmba.
Muri ubu buryo bugira kabiri, turondera ijwi ry’ururirimbo twishimikije “boucle” y’ama “Accords” y’izindi ndirimbo zahinguwe n’abandi, zizwi, atari iz’iwacu. Mugabo rero, ntiduheza ngo dusubiremwo nya ndirimbo, ahubwo, duca duhingura “mélodie” yacu nshasha idasa n’izo. Tumaze kubikora, dusanga mbere na rwa ruririmbo twaburako tutakirwibuka. Ivyo birafasha cane-cane abaririmvyi bagitangura uwo mwuga kuko bataba baramenya ivy’ubuhinga bwo guhingura amajwi y’indirimbo.

Rero, mu gutangura, banza utore ururirimbo kanaka uzi kandi usanzwe ukunda gusumba izindi. Uce wabura ama “accords” yarwo ayo ari yo yose ushaka, uheze uce utangura kugerageza kuyaririmbirako ijwi “mélodie”, ugenda urumva ikujemwo. Mu ntango uzosanga bitakworoheye kuronka “mélodie” y’iwawe bwite, kuko uguma ukwegwa na ya yindi waburako. Ariko bukebuke, utanguye gusa n’uwuyiyibagiza, ukigirira ivy’iwawe, uca usanga nawe wabaye umuhinga ashobora gukora ivyiwe yisangije. Umaze kuronka “mélodie” y”iwawe bwite, ca utangura kuyongerako ayandi majwi aryohoye (Harmonisation), wibagire amwe ya mbere wabura ku ndirimbo y’abandi, naho amwe-amwe bidakunda ko uyareka rwose.

3. Guhingura “mélodie” yawe bwite ufatiye ku majambo wanditse canke yanditswe n’uwundi muririmvyi.
Biramaze kwigaragaza ko abaririmvyi benshi ari abandika amajambo imbere yuko bahingura Umuziki w’ururirimbo rwabo. Burya tuvyihweje, dusanga amajambo atekeyemwo imbizi iha akaranga ururirimbo n’ijwi ryarwo. Akarorero, nk’iyo ufise amajambo y’umubabaro, bica bigusaba gukoresha “Tonalité Mineure”.

Kugira wubake “mélodie” wishimikije amajambo, bigusaba kubanza kuyasoma incuro nyinshi nk’uko twamaze kubivuga, kugira akwinjiremwo neza. Umaze kwumva akayaga kayo kaguca irya n’ino mu mutwe, ca utangura kugerageza kuririmba ayo majambo gushika uronse ururirimbo wifuza. Vyanse na ho, wikore ku buhinga bwo gukurikiranya ijwi (intonation) n’iryungane ushaka (phrase).

Dufate nk’ijambo “UMUTIMA”. Ubwa mbere tubanze turivuge nk’aho umengo turiko turagerageza kwemeza umuntu ariko araduhaririza. Ubugira kabiri na ho, turivuge nk’aho umengo duhejeje kwumva inkuru mbi. None mubona twayavuze kumwe? Iryo tandukaniro rivana nuko ijambo riba rivuzwe bivuye ku mvo kanaka tuba dukuyeko. Mu yandi majambo, IMVUGO YACU NTIYAMA ISA? ARIKO IMEZE NK’IJWI RIRIRIMBA RIGENDA RIRAHINDAGURIKA. Ivyo rero ni vyo umuhinga w’umuziki akoresha mu guhingura ijwi ry’ururirimbo rwiwe ashingiye ku majambo yarwo.

Akarorero: Ufashe rya jambo “UMUTIMA” ukarivuga nk’umuntu ahejeje kwumva inkuru mbi, biragaragara ko ijwi ryawe riza kumera nk’iriduga kugira werekane ko iyo nkuru iguteye ibibazo n’uruhagarara. Muri ico gihe rero, uca utahura ko utegerezwa na ho nyene kurondera ubuhinga bw’ijwi riduga mu kuririmba.

4. Gukorera kuri “mélodie” y’ururirimbo rusanzwe ruriho, tukayihindura.
Ibi rero, ariko, tumenye ko bibujijwe n’amategeko akingira ibikorwa vy’abanditsi n’abahinga (Droits d’Auteur). Hari aho Umuririmvyi ashakashaka, usanga ahinduye “Rythme” y’ururirimbo rwari rusanzwe rwarakozwe n’uwundi, ariko akagumya amanita yarwo uko ameze. Kenshi ababigenjeje gurtyo bama basanga bubuye ibintu binyuranye rwose na rwa ruririmbo baburako. Abandi na bo, usanga babura “Rythme” yonyene, ariko bagahindura amanota y’urwo ruririmbo. Yamara naho dukora ivyo, twicare tuzi neza ko amategeko atabiturekurira. Nta kwiba no kwigana ivyo abandi babiriye akuya.

5. Kuririmba umuziki n’amajambo utabanje gutegura (Improvisation)
“Improvisation” ni ubuhinga buzwi hose kandi bukoreshwa cane na benshi, bugatako bukaba bworoshe gukoresha. Nta kindi ukora atari ugufata imashini ifata amajwi, ukaririmba ivyo wiyumvamwo vyose kumara nk’iminota 10 canke irenga udahagaritse, uriko urifata amajwi. Uhejeje, ca wicara wumvirize ivyo wakoze. Bizogutangaza cane. UCE UVYAGURA. Biravukamwo ururirimbo!

« Dans le doute, il faut choisir d’être fidèle »
(François Mauriac, écrivain français, 1885-1970)

Nous contacter :
INSTITUT DE MUSICOLOGIE DE GITEGA
B.P. 197 Gitega, Burundi
Tel : +257 79 877 097 ou +257 77 758 123
E-mail : baransajust@gmail.com
https://musicologygitega.wordpress.com

Publicités

Publié par

MUSICOLOGY GITEGA

Ancien professeur de Musique, Justin BARANSANANIKIYE fut l’un des fondateurs de l’Orchestre national du Burundi en 1977. Il a participé à différents programmes inter-africains pour la promotion de la Musique tenus au Niger, au Bénin et au Togo. En 1991, il reçoit son « Doctor of Divinity », et en 1993, son « Doctor of Ministry » de Asia Graduate University and Theological Seminary, ainsi que l’« International Culture Prize in Religion ». Evêque depuis 1999, il est le fondateur de L’INSTITUT DE MUSICOLOGIE DE GITEGA en 2013. Il est aussi auteur du livre "THE SWEEPING WAVE", (ISBN : 978-1-4567-8172-9) publié en 2011 aux éditions Authorhouse, Indiana, USA, et aussi "DE L'INANGA A LA GUITARE CLASSIQUE-L'HISTOIRE DE LA NAISSANCE DE LA MUSIQUE BURUNDAISE MODERNE" en 2014.

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s